Sunday, January 15, 2012

我們所掛心的,不是神的國嗎?

經過上星期日千辛萬苦,搵到本地講華語嘅教會,但又因為無銀仔撘唔到巴士去唔到嘅慘況,這星期日終於有增值咭,可以安然撘車番教會,唔駛好似遊客入去美輪美奐嘅天主教堂但又聽唔明西班牙版本嘅神話 (神的話語)。話哂都係中華基督教會,喺電話中聽到牧師去過窩福 (我喺香港所屬教會),心想應該唔怕掛,至少可以唔駛入去靚教堂只為觀光。下午四時有崇拜,啱哂我哋呢啲適應咗晚出早歸嘅布市人生活 (我唔敢講係阿根庭人生活,因為總會有早出晚歸嘅農夫罷)。


我們遲咗十五分鐘到達,原來喺巴士上見到嘅華人都喺度,早知跟佢哋早一個站落車啦。嗰度係一間有獨立建築嘅小教堂,一入去見到會眾已經企哂喺度唱歌,之後仲繼續企半個鐘唱,好彩我哋遲啲到,其實仲應該再遲啲,唔駛為企而企,唱詩啫,唔駛一定要企掛。帶唱詩嗰個人帶領祈禱時充滿感情 : 神呀,請差遣我! 請差遣我! 請差遣我! 請差遣我! X N次,周圍啲人嘅"Amen" 聲 surround sound咁四面咁嚟。 Maria 以為係練緊法輪功或靈恩教會聖靈充頭咁(M:呆咗,只好一字一字極緩慢的閉目念天主經抗衡一下)。其實我對呢啲充滿情感嘅教會唔會太過抗拒,因為我來自比較理性及讀經為主的教會,總會覺得可以多一些愛主嘅情感交流。況且係場刊中寫到該教會嘅2012主題為"活出神國度特質",第一季係秉行公義,啱哂我支笛。佢嘅異象係: 建造實踐、禱告、更新、裝備、相愛、宣教的教會",使命: "跟隨聖靈浪潮、禀持復興信念、塑造國度人材、完成宣教使命"。都幾Evangelist,同我個教會都幾似。所以我可接受一下其他人嘅唔同。


之後佢哋有歡迎新來賓,所有人都走過來同我哋握手,我無乜所謂,Maria通常都好怕這種熱心教會的熱烈歡迎。(M:當係握手互祝平安反而冇乜特別,只係先前一陣surround sound驅魔人式的熱烈祈禱聲令我有點起雞皮。 )


跟住有一個叫 Lydia 嘅阿根廷醫生講佢係山區嘅事工,教會有部份捐款用嚟接濟十幾條係離布市廿多小時車程的小數民族材落,佢哋唔識西班牙文,小朋友經常營養不良,無水無電,健康設施不足。其中一條村叫 Wichi el Pintado 佢哋只係飲用一潭和動物共用嘅死水,事工帶食物、衣服、玩具捭兒童,幫村民剪頭髮、醫病等。佢哋好多謝教會,知道係華人教會,就算唔知中國喺邊都會為中國人祈禱。其實呢個事工源自Lydia嗰姐姐,要去幫呢班西班牙文都唔識但會下山向佢求醫嘅村民。令佢知道有呢十幾萬小數民族喺山上存在。之後,佢有異象要去中國宣教,當時佢知道自己有癌症仍然要去,化療令佢無哂頭髮、皮膚乾乾的,但在雲南服侍期間佢生番嘅頭髮由之前嘅金變黑,而皮膚亦變得好似當地少數民族咁,最後再次病發,送回國才去。Lydia繼承姐姐工作。


呢個係好令人感動嘅事,傳道人跟住拿起小信封求為此作奉獻。我就不以為然,呢個教會每月都有幾千peso嘅餘款,況且佢講到秉行公義,喺呢個民主選出嚟嘅政府佢哋唔係應該可以要求政府做啲嘢咩? 後來我知道點解...


個女傳道深受感動,特別一班土著會為中國人祈禱,Lydia姐姐有個"中國心",喺呢度"中國人"唔係應該保持呢個"中國心"呢? 佢話佢係台灣人,同其他大陸同胞已經係兄弟姐妹了。就算佢準備講題講詩篇22:3、歷代志上15:25-28、下:20:3-4,14-17,21-23,都抛諸腦後,要我們合眼唱甚麼"我的一顆中國心"。 我實感難耐,當他們沈醉在自己不知何謂嘅國民身份認同時,我哋就轉身離開了。(M:就知道他們大唱什麼中國心的時候,AT一定受不了,應該可以不再來這受不了的祟拜~笑)


我慶幸生在香港,對國民身份沒有熱忱,佢哋咁要愛國,點解離開? 因為大陸仍是被所謂共產黨嘅非法政權(非法者,公然違反自己定的國家憲法)蹂躪嘅中華大陸,國之不國,人民生活無出路才會外徒。還要為那"中國"國民身份祈甚麼禱 ? 我真係諗唔到要為魔鬼祈禱嘅理由。(M:錯,魔鬼是一個角色定位,仍要為免我們陷於誘惑而祈禱。)當然共產黨用人民的血汗錢在世界各地扶植親共勢力,呢個教會可能不能幸免。來自大陸嘅華人做慣奴隸,在他鄉自己顧自己,要佢哋入鄉隨族,認同阿根廷人身份,重新塑造公民身份及自己的公民影響力,只係對牛彈琴。


就算唔做阿根廷人 ,做神民更好吧,點解仲諗住當外邦人呢?

2 comments:

  1. 剛知道余杰被迫流亡美國,因為他寫溫家寶是影帝,香港傳媒敢報導嗎?
    http://news.chinatimes.com/mainland/11050505/132012011900002.html

    ReplyDelete
  2. 對生果、方向報或無記等主流新聞沒有期望,聽敢言的網台吧,你可不同意主持的評論,但最少會告訴你一些事實。M

    ReplyDelete

You can give comment easier by being our followers. You can also do that as anonymous or put your name in the message. Meet you somewhere in future.