好抵玩嘅告路架國家公園

由於呢個國家公園太多人寫，好多係英文，所以用英文寫博文有啲平凡，或者用廣東話寫比較親切。我諗唔係好多香港人好似我哋咁可以平價去南非睇野生動物，其實safari嘅意思係去遠行，同睇動物可以無關。

喺基督農場做咗兩個禮拜義工，比得兩夫婦帶我哋、另外兩個英國女仔同德國女士，到南非東北部告路架國家公園參觀。聽講喺南非國家公園睇動物比其他非洲國家睇更貴，我哋經過坦桑尼亞一役有啲擔心。誰不知比得自己楂車入場，我哋只需要俾入場費、紥營費、分擔入油費同食物就掂，佢唔會賺我哋錢，只為開開心心玩三日兩夜。

第一日天未光我哋六點出發，從Pafuri閘入公園，沿途我哋食零食飲茶飲咖啡，以佢哋兩夫婦各精於茶及咖啡，我哋不愁無好嘢飲。天色不太好，天陰又落兩，朝早無乜動物睇，只係喺湖邊嘅觀鳥屋睇到鱷魚。下午見到多啲，有美麗嘅釣魚翁、

好多鹿、水牛等，令我哋興奮嘅係睇到其他國家較少睇到嘅河馬。我哋喺條橋下睇到大大小小嘅河馬。大嘅喺水度調情交配，細嘅喺度互咬同玩。睇到我哋唔捨得走。

快天黑，呢度有規則要下午六點前入營地，否則要罰錢。點知駕車喺中間俾地羣大水牛圍，佢哋對我哋有啲唔友善，仲有一隻阿頭走過嚟凶我哋。我哋曾經聽過有大象因為俾汽車引擎騷擾而將一架車變成癈鐵，為免俾成班有架車咁大嘅大水牛撞埋嚟，我哋要將熄引擎，到適當時候才慢慢離開。到達營地已經六點半，好彩管理員網開一面俾我哋入。

喺Mopani營地我哋見到有小鹿入離搵嘢食，我地帶咗營，其他人住簡單嘅營屋。當晚我哋燒烤食牛肉飲南非紅酒，營地電網出面我哋見到野狗望住我哋食嘢。當晚落雨，睇嚟第二日天色都唔係好...




第二日朝早出發見到野狗喺路邊坐喺度 (等我哋?), 跟住打橫喺我哋車前面行過, 原來佢真係陀背! 佢當我哋你到咁施施然地行。我發覺呢到啲動物唔似坦桑尼亞嗰啲咁怕人，仲會帶攻擊性，唔老嚟就凶過來，果然充滿獸性。
 
啲長頸鹿可能因為素食比較溫馴啲，都會怕下人。 而森巴嘅好朋友野豬就較好奇，特別係細嗰啲，鍾意望我哋，要阿爸叫到先肯走。

 呢度啲大象比較珍貴，每隻都有名，會有管理員經常追蹤。喺營地有大象博物館，紀錄各大象資料包括點生點死。我哋喺早上見到一隻較年輕活潑嘅象，而我哋都會熄引擎，費事激到佢。


 下午天色明朗啲，我哋較多見到一羣羣嘅動物，包括鹿、駝鳥等。見得唔少，我哋都見怪不怪，少咗一份當初睇嗰陣時嘅興奮。我只想睇到從未見過嘅大豹及獵豹，搵咗成個下午都搵唔到。唯有收兵，第三日再搵。

第三日早上搵極都搵唔到未見過嘅動物。正當失望而回之際...

居然俾我哋喺一個鐘頭內見到獅子(雖然比較遠)、獵豹(佢喺草叢伸個頭出嚟，真係好難發現到)同好近咁睇到大豹。

 隻大豹啱啱捉咗隻鹿，拖咗上路邊大樹度食。我哋做好近咁睇哂。

懷住滿足嘅心情離開，仲要俾我哋睇到另一隻大象走過嚟(同我哋講拜拜?)，但又好似來者不善。為安全起見，我哋都係熄引擎，等佢行過先走。

番到農場已經晚上八點，呢次睇動物旅程同以往唔同，又平又抵又好玩多動物睇。三日兩夜每人只係一千港元包飲食包住，邊度搵?

但係慳埋慳埋到最後喺開普敦俾人呃番，容後再講。