中國城一日遊

阿根庭年廿九即香港年初一，我哋去咗中國城跳舞。唔係夜總會，而係唐人街。呢度牌坊都叫中國城。附近公園有露天舞會，唔駛錢，當然要去啦。舞會八點先開始，我哋四點已經迫入中國城逛。因為農曆新年，好多遊客慕名而嚟睇華人過年，周圍迫得水洩不通。點知我哋做埋啲遊客嘢，如果唔係為咗買華貨，去外國入唐人街真係有啲憨居。好多人要試吃各式煎炸嘢，食好嘢嘅我哋緊係敬而遠之。 呢個時候華人超級市場變成大排長龍嘅博物館，遊客同當地無乜入過中國城嘅人對好多嘢好新奇。佢哋拿住奚錢專心硏究、又有個阿婆指住龍眼問我係乜，我用西文話fruto，佢好開心，我都好開心(因為可以講到)。


入超市買中菜食材係為準備香港探弋同學會嘅大食會。嘩！啲嘢好貴，半斤冬菇（不過都大嘅）賣成百港銀。啲蝦乾仲衰，只不過係蝦皮，成五十港銀一小包。為咗之後整蘿蔔糕，買咗幾個唔啱季節嘅白蘿蔔、十幾元一包(x2)粘米粉，用沙樂美乾腸當臘肉。仲貪得意買咗啲貝殼類嘅嘢，成12 peso一公斤，點知喺隔離超市仲大隻啲賣9 peso，唉...


買完嘢六點鐘，仲有時間，喺草地聽現場表演，攤喺度聽。草地雖然有啲濕，但也舒服。有探弋樂隊，當中有華人的手風琴手，亦有唱很好難嘅華人女歌手唱"月亮代表我的心"，唔知唱乜嘅人當然覺得佢好聽，聽鄧麗君大嘅我就覺得剌耳。鄧麗君係全球華人嘅diva一啲都無錯。


仲有非華人組成嘅阿根廷蔡李佛龍虎武師，奇怪嘅係呢度啲人見到舞龍就要走去摸，好似摸狗仔咁，其實個龍頭好似狗頭 (讀狼圖騰就知我講乜)，咁得意啲人想摸下，應該無乜吉祥意思。


等到八點，終於有舞跳，Maria好發市，好多佬請佢跳。我還可以，有一個女嘅同佢跳完兩隻歌就講mucha gracia 咁就走咗，打沈咗...之後都有個跳得好好嘅同我跳Pugliese,佢講咗一大堆西話我都聽唔明, 我估佢話好熱又或者喺附近音樂會好嘈掛。


背囊啲海鮮唔可以放太耐，舞會未完就搭巴士走，好多人走，好似工展會散場咁。

啲貝殼類嘅嘢好難攪，勁浸都好多沙，又沖又洗，煮到Maria死死下。


最後拜個年，祝身心康泰。