現場報導 - 體育會主場迎戰歌利亞, 雙方打成平手

如果唔係呢場波, 我哋可能一早離開La Plata。場波啲飛要當日走去球場先買到 (球會會員可以之前兩日買)，仲要好似買藥咁喺個好細嘅窗度買，麻鬼煩。 最後買'general'企位 (男嘅60peso女嘅40peso,因為要吸引多啲女球迷入去呢個一向陽剛味重嘅活動)，希望可以感受下氣氛。小部份在瑒側嘅座位係俾VIP,但d觀眾較靜，只會乖乖哋坐。

球隊主場對當地係大件事，差不多成個La Plata城嘅人都去支持，球場附近迫得水洩不通。一個個排隊入場，要搜身，唔准帶樽 (玻璃免問)驚人飛樽入場。我哋企喺石屎板凳的看台睇波。點解石屎? 因為我哋會不斷跳，唔跳就代表你唔係自己人 (其實無乜嘢，只係啲人會以為你係遊客)。

 

球賽開始前，球迷會不斷唱球會歌，又會有旗海示威，當然又會不斷跳，跳到啲石屎凳震哂。男女老幼都大聲唱，好熱鬧。當然時不時都聞到草味。

講番場波，其實係乙組賽事，實力有限，主隊位居第五，和客隊位居榜首打成拉鋸戰(其實都有啲悶)，我哋覺得客隊實力較強，交波較準，主隊只有拼勁攔截，射門把握麻麻(這個當然唔會同主隊粉絲Leandro講)。（M:但主隊個龍門截得好，仲好似幾靚仔。）最係互交白卷，我哋志不在球賽，而是睇下啲球迷點用粗口鬧球証及對方球員。如果佢哋認為球証唔判，男女都會問候佢娘親。

賽事完畢，魚貫離場，另加節目食燒腸包，街邊檔生意滔滔不絕。賣成10peso賺死佢，老婆口痕難抵引誘光顧。其實睇球賽喺阿根廷也是賞心樂事，有得瘋狂有得鬧人發洩有得食，過癮。(M:場內仲有不少青春少艾的美女睇波，曾先生當然高興！）