巴西家庭之旅 - 下集

個火又唔勁,用來將牛骨飛水嗰煲水要成三個字先滾，有兩個couchsurfers (一個德國人,一個芬蘭人)九點半到，好彩有幾個壓力煲可以將排骨炆焾,又用另一個壓力煲煑牛骨湯，最後出爐有炆甜酸骨 (真好,可以用哂樽紅醋, 唔洗搬咁重)、番茄薯仔牛骨湯、牛骨湯煮飯、奶油津白。 九點九開飯。其間聽Juracy同嗰兩個女仔講德國及芬蘭歷史，仲比嗰兩個女仔多。餐飯當然啲餸無哂，剩番的飯仲可以留低日後炒飯。嗰晚吃得太飽煮得累，沒有出去跳舞了。

第三日起床有些晚，吃過沙樂美腸飛碟，Catalina媽媽話我哋昨日已經煮咗嘢，今日由佢煮。食食下飛碟，個德國女仔隻手俾隻chou chou 咬到，原來隻狗喺佢兜食物附近係生人勿近，嗰女仔隻手踵哂，有發炎跡象，但唔同人有唔同反應：個女仔都算鎮定，無叫，只係按住傷口行開，但面青口唇白、阿仔手掩面好苦惱咁樣、阿媽用番皂洗傷口，其實都好，之後我用自己私伙綳帶包佢個傷口止血及吸濃，但阿媽問過佢嘅朋友Ana做醫生個仔，佢話唔駛包，成塊綳帶拿走，嘥我心機兼嘥料。

之後我哋去嗰個醫生屋企，以為可以幫傷口做啲嘢，走到上去十樓(已經係當地少有啲高樓)，原來係陪Juracy為醫生講解去羅馬旅行嘅心得，後者對個傷口無乜點理。可能佢工作時間以外唔可以做工作嘅嘢掛？或者佢覺得無乜大礙...

之後我有得揸車，原來阿仔無車牌，佢揸車嚟接我地都只不過係偷雞，我有國際牌，適應一下左軚就膽粗粗揸上去高速公路，去附近一條河玩。喺公路我揸到限定100km都俾人嫌慢，下下要揸120，仲要入小路將架自動波當四驅車咁揸。去到條河，原來係一個家庭露營地，條溪啲水普通，喺乾旱嘅當地已經係難得玩水地方，我哋浸下水就揸車番屋企，媽媽已經煮好晚飯，有傳統嘅豆同飯、煮牛扒、沙律，仲有薑檸檬汁，簡單滿足的一餐吃得很開心。

最後一日無水，呢個地區無乜雨，就算喺一個大湖及大壩附近，都可以制水。其實媽媽平時好環保，洗碗廢水會叫老公攞去淋花、啲廚餘會用嚟做肥料、膠袋會洗過再用、用過嘅檸檬會用嚟洗碗。我用咗啲冷飯炒飯，一家食得開心，跟著成個晏晝無乜嘢做，只係上網，我準備煮苦瓜炒排骨(其實無鑊好難炒嘢，只好用阿婆留低嘅古董大鋼盤，唔係好受熱，炒唔起火氣)，M想用埋啲粉做水餃，因為無粘米粉做蘿蔔糕我就炒白蘿蔔算了，再加甜棘排骨。所有人都吃得高興，唯有白蘿蔔剩下，呢度啲人唔係點慣食，我哋就打包之後當午餐。

 

第五天我哋晨咁早要回Foz do Iguacu, 成家人早起同我哋送行，好感動。

呢個係一個很充實嘅巴西家庭體驗，多謝Juracy一家。我哋會番來探你哋呀。